Vous êtes ici : Un monde sensé > Logiciel - Prougramàri - Programaro > Prougramàri libre
Prougramàri libre
JPEG - 8.3 ko

Un mounde de partage e soulidarita
acarant lou marcat de gus

1. Uno utoupìo realisado

Uno utoupìo es à mand de veni realita e se n’en parlo pas ! Lou prougramàri libre fai d’à cha pau forço embalun dins l’espàci infourmati. Quau aurié pouscu imagina qu’un Mounde coume lou prougramàri libre nasejarié à parti di « garcejarié » di moumen de campò de milàntis infourmatician geniau, escampiha dins lou mounde entié e liga soucamen pèr Internet ?
Un prougramàri libre es un prougramàri que soun usanço, soun estùdi, si mudasoun, sa còpi e sa difusioun soun libre e souvènti fes à gràtis.
À gràtis ? Coume es poussible dins un mounde ounte tout se chabis ?
Tout de long de soun istòri, l’infourmatico s’es bastido, dins un mitan d’afouga, en fasènt si freto de l’obro de si davancié.
« Siéu ço que siéu, bono-di lis autre, aquéli que m’an passa davans em’aquéli que me coustejon ».
Aquéu prouvèrbi african s’entrais coume la bago à l’anèu à-n-aquéu relarg nouvelàri de l’infourmatico, pèr ço que pretoco lou gàubi e l’evoulun di couneissènço.
Se pòu-ti imagina d’escriéure un pouèmo sènso ges counèisse de pouèmo avans ?

2. Uno liberta pèr tóuti

Pèr la coumunauta qu’a engimbra li licènci dóu prougramàri libre, li creacioun de l’esperit fan partido dóu bèn coumun de l’Umanita. La prouprieta inteleitualo es uno raubarié ! Un prougramo o l’un de sis elemen, proun bon pèr resòure un proublèmo, pòu servi en d’autre. I’a-ti uno souleto rasoun de lou pas parteja ? O encaro pus fort de lou faire siéu ?
Basto ! es un afaire de liberta, que l’an defini ansin :
- 1) La liberta de faire usanço dóu prougramo coume l’on vòu, dins quento amiro que fugue.
- 2) La liberta d’estudia lou code sourgènt dóu prougramo e de lou cambia pèr que fague ço que l’on souvèto.
- 3) La liberta d’alarga de còpi de prougramo pèr fin d’ajuda quaucun.
- 4) La liberta d’alarga de versioun moudificado, pèr fin que touto la coumunauta n’en fague si freto.
Basto ! Chascun pòu prene sa part à-n-uno coumunauta ounte chasco coumpetènci es benvengudo (de la redacioun de la doucumentacioun à la dóu prougramo infourmati en passant pèr la reviraduro dins uno autro lengo) e mounte chasco realisacioun es counsiderado coume uno ressourço couleitivo.

3. Uno prouprieta pèr tóuti

Es dins la pountannado de 1970 que l’idèio de prougramàri prouprietàri o « privadou » a creba l’iòu. Nosto epoco s’abrivo devers l’alargamen e lou durcimen di mecanico de la prouprieta dins tóuti li relarg. Pamens, aquelo tendènci à faire siéu, dins l’escasènço de l’infourmatisacioun e de ço que pòu representa, sourgènto pas d’uno meno de lèi naturalo. E pren, vuei, talamen sis aise que :
- 1) Es ilegau de vèndre un equipamen infourmati sènso i’apoundre un prougramàri prouprietàri (just e just Windows de Microsoft). Aquéu biais de faire reverto proun un sistèmo de vèndo ligado, es pamens vengu la règlo dins aquéu relarg. Es quàsi toujour impoussible de croumpa un PC sènso Windows, franc de lou croumpa tros à cha tros e de se lou mounta tout soulet !
- 2) Sus un poste infourmati, lou pres di prougramàri es souvènt pus aut que lou pres dóu materiau. Acò’s en generau la règlo dins lis entrepreso proufessiounalo.
Dins la realita, pèr li poste infourmati persounau « barron lis iue » quouro se devinon dins l’ilegalita.

4. Lou respèt dis idèio dis autre

L’escrituro de prougramàri es un relarg mounte, toucant la prougramacioun, es tras qu’eisa de coumpausa’mé lis idèio dis autre. Li prougramo, tre que soun tremuda fin d’èstre eisecuta pèr l’ourdinatour (se dis dins lou mestié « amoulouna »), escoundon coumpletamen lis ourigino di moudule que li coumpauson (se dis li « font »). La tentacioun es grando de faire siéu li resulto e de demanda de dre d’autour.
Quant de prougramo o moudule de baso (que ié dison : unita, proucedimen, founcioun, macrò…) escri pèr d’afeiciouna dóu mestié, que represènton souvènt de semano, de mes e de cop que i’a d’annado de travai, soun ansin recoubra pèr li soucieta que beilejon ço qu’es estigant à l’industrìo infourmatico, pèr èstre pièi coumercialisa, adrechamen amenala, e es enebi de ié touca. Acò’s bèn marca dins lou countrat dóu prougramàri !
Es bèn precisa qu’en vous lou chabissènt, fan pas mai que de vous « lou presta » en vous permetènt de vous n’en servi tau coume èi. Demoro la prouprieta de la soucieta que l’a empaqueta emé tant de siuen. E pièi, es impoussible de saupre ço que fai pèr de bon… , en mai de ço qu’es en mostro dins lou fenestroun !
Tout acò’s bèn defini pèr un « copyright » o countrat de licènci (EULA : End User License Agreement. En prouvençau : CLUF : Countrat de Licènci Utilisaire Finau).

5. La béuta de la douno acarant lou marcat de gus

Es à parti dis annado 1980 que d’ùni se soun avisa dóu proublèmo que poudien pausa li prougramàri « prouprietàri ». Lèu-lèu, dins lou moundet dis especialisto d’infourmatico que travaion is USA sus lou tèmo de l’inteligènci artificialo dins l’oubradou dóu MIT (Massachussett Institute of Technology) un mouvimen de reguignado s’ourganiso.
Richard Stallman, matematician e infourmatician d’elèit, beilejant uno crousado infourmatico que s’apielo sus nòsti principe coustumié de liberta, d’egalita e de freireta, engimbro la resistènci que s’espandis dins li mitan universitàri american. En 1984, decido de se groupa à-n-un sistèmo de prougramàri coumplèt sus lou moudèle d’UNIX (sistèmo infourmati que fai marcha li gros ourdinatour) pèr lou semoundre libramen en tóuti li qu’acò lis interesso, en prepausant de lou faire evouluna pèr uno obro couleitivo. Prepauso de lou bateja GNU (GNU is not Unix ; en prouvençau : GNU es pas Unix). Éu largo quouro rescontro si partisan :
« Ai tira lou plan de desvouloupa un sistèmo d’espletacioun libro e à gràtis o de mouri en assajant…, de vieiounge, de-segur ! »
Ajuda d’especialisto e d’avoucat, la licènci GNU/GPL (GNU/ General Public License) es escassamen definido.

6. De pirato gardian di liberta

Lis afeiciouna que se retrobon en roudelet e prenon lou noum de « Hackers », se groupon au travai, soustengu pèr quàuquis entrepreso que bouton à sa dispausicioun lou code sourgènt de si prougramàri. Li « Hackers » qu’en Franço passon pèr de « pirato infourmati » soun, proumié, d’infourmatician geniau que vivon de soun gàubi emé passioun. Pèr éli la prougramacioun es un art e fan espeli de prougramo pèr lou plasé, pèr la béuta dóu gèste. Pèr éli tóuti li prougramo podon èstre meioura. En partejant soun travai, lou code sourgènt de si prougramo, bouton l’ameiouramen dóu prougramo avans touto causo. Acò li gardo de la farfantello dóu gasan, o de la croio. Soun à l’ourigino de quàsi tóuti li nouveta que fan avança l’infourmatico e Internet. D’ùni soun vengu li gardian de nòsti liberta e denóuncion lis asclo infourmatico, lis abusanço di prougramàri, toucant lis ataco contro la vido privado. Adounc, coume vai qu’en Franço, lou « Hacker » es soucamen quaucun qu’utiliso si couneissènço infourmatico pèr fin de coumetre quauque mal-adoubat ?

7. À Linux pèr la vido

En 1991, un estudiant finlandés, Linus Torvalds, prepausè pèr Internet à la coumunauta de meioura un prougramo qu’éu avié councebu. E tres an pièi, soun travai fasié perfetament musico e èro recouneigu souto lou noum de GNU/Linux en licènci publico. Lou sistèmo es capable de remplaça Windows de Microsoft e represènto uno grand cambado devers la recouneissènço dóu camin de partage dóu travai realisa. La dinamico fléujo e decentralisado d’Internet permèt de prepausa un moudèle de devouloupamen nòu sus lou mantèn d’uno raisso countinuio d’idèio. Dins aquéu peiròu espetaclous versant de talènt, de tóutis aquéli coumpetènci estrambourdado, li causo n’en poudien naturalamen pas demoura’qui.
Partènt de 1994, lis utilisaire se boutèron à garceja sa propro versioun. Diferènti « distribucioun de prougramo » fuguèron alor desvouloupado, souvènti-fes à gràtis. Mai li soulucioun seriouso saran realisado mai que mai pèr de colo estruturado à l’entour dis Universita. De distribucioun diverso crebèron l’iòu : Debian, Slackware, Red Hat… segound li councepcioun dis autour.

8. Uno gaucho d’autour

Lou desvouloupamen de diferènti entrefàci grafico a coumpli lou presfa, assegurant i diferènti versioun uno istalacioun pèr lou mens autant simplo coume li diferènt prougramàri dóu coumèrci.
En 1998, la FSF (Free Software Foundation. En prouvençau : la Foundacioun pèr lou prougramàri Libre) qu’empuravo lou proujèt despièi 1985, a vist uno part de si membre fourma uno autro assouciacioun : « l’Open Source ». Lou councept permèt à d’entrepreso de bouta dins lou coumèrci de prougramàri libre ounte caupon de partido noun-libro. La noucioun de liberta dóu prougramàri passo au segound plan. « Tout ço que vous fai mestié pèr chabi de prougramàri libre, es de li faire veni interessant pèr lis entrepreso ».
N’en ressort uno licènci novo : l’Open Source.
La reacioun de la FSF à-n-aquelo separacioun a fa naisse un nouvèu sigle, lou « copyleft » o « gaucho d’autour » (jo de mot pèr oupousicioun à « copyright » © o dre d’autour) que vòu pas ausi parla de partido noun-libro o prouprietàri dins un prougramàri libre.
Avès devina tout soulet, quente es lou logò chausi :

9. Partage e soulidarita dins un mounde de brutalas

Un moumen counsidera coume de curiousita o de ninouieta d’especialisto, dessaupènt li feróugi lèi de la vido ecounoumico, aquéli nouvèu biais de faire couóuperatiéu s’afourtisson aro coume mai fruchous, e subre-tout mai capable d’adraia la recerco devers d’amiro d’interès generau, e favourison la diversita culturalo.
Acò’s parteja l’inteligènci e l’engèni dis autre !!!
Proun tèms agarri pèr li gròssis entrepreso infourmatico, aquelo novo famiho de lougiciau es vuei quasimen la règlo pèr l’equipamen di grand comte e dis amenistracioun publico. La noucioun de prougramàri libre que s’es pau à cha pau impausado, treviro lou moudèle ecounoumi de l’industrìo infourmatico.
La gratuita, que fai partido dis avantage li mai cita, es rèn qu’un aspèt segoundàri de la questioun. La noucioun de liberta es bèn mai tihouso pèr lou sistèmo en plaço. Mèfi ! un prougramàri pòu èstre à gràtis sènso èstre libre. Dins lou relarg dóu prougramàri coumerciau, se sèrvon d’aquéu biais pèr tua un councurènt. Pèr eisèmple : Microsoft que s’es bouta subran à distribuï à gràtis soun navigadou – Internet Explorer – pèr faire peta soun councurènt : Netscape.
De-segur, un prestadou de service pòu prepausa de prougramàri libre, encò di particulié o dis entrepreso en li moudificant meme à sa demando e en lis asatant au mai proche di besoun. Ço que faudra paga es soucamen lou service rendu. Aquelo noucioun es impourtanto pèr l’ecounoumìo loucalo : Vèndre un prougramàri prouprietàri es èstre l’entre-gènt d’un sistèmo que si retoumbado ecounoumico majo s’entournaran de la man d’eila de l’Atlantico, mentre que de vèndre uno soulucioun libro e uno prestacioun de service, es avaloura un saupre-faire loucau.

10. Pèr tóuti li goust e li coulour

Vuei, poudès trouba, souto diferènti versioun Linux, un mouloun d’aparèi, de l’ourdinatour au telefone barrulaire. De centenau d’aplicacioun an creba l’iòu e represènton de bèu tros de marcat. Pèr eisèmple :
- Apache : Lougiciau de servèire Internet, 78% dóu marcat moundiau (GNU e Open Source).
- Firefox : Navigadou Internet, de centeno de milioun d’utilisaire dins lou Mounde.
- Thunderbird : prougramàri de courrièl, dispounible dins 52 lengo.
- LibreOffice : Seguido d’ouficino coumpleto que pretoco 19% dóu marcat francés.
- Ubuntu : Sistèmo d’espletacioun Linux, que tèn lou coumparant à Windows, demié li pus simple d’usanço.
- E sai-pas-quant d’àutri versioun e prougramàri de touto merço.
Vaqui abord de rasoun qu’an fa qu’en Franço 50% di croumpaire de prougramàri libre soun li grand comte, que 36% n’en soun lis amenistracioun publico. (Sourgènt : Counsèu Naciounau dóu Prougramàri Libre).
… Bouto ! E li Francés, quouro èi que n’i’en parlon di prougramàri libre ?

11. Un mounde sena que li richas n’en soun jalous

La liberta se devino èstre un pounchoun de nouvelun e de creacioun pèr lou mens autant pouderous coume lou moudèle tradiciounau de la prouprieta inteleitualo apielado sus l’atribucioun à l’enventaire d’un mounoupòli pèr acourda de dre d’usanço en escàmbi de pecùni.
Mai lou grèu de liberta, enserta dins li principe proumié d’Internet es sèmpre amenaça. Contro-istas pas eisadamen un relarg ounte de cabau s’amoulounon dins l’afaire de quàuquis an. Ansin Bill Gates, lou rèire pelot de Microsoft, agacho li tenènt dóu prougramàri libre coume de « coumunisto à la modo d’encuei » !
Lou Gus lou 30/04/2011

Vèire sus Internet :
- http://fsffrance.org
- http://april.org
- www.framablog.org
- « Libres enfants du savoir numérique »
...e proun d’àutri site encaro !

Noto de traducioun : Pèr lou voucabulàri teini de l’infourmatico, lou prouvençau i’estènt gaire afa, sian ana querre li chausido leissicalo dóu catalan e lis avèn facho nostro souvènti fes.


Coume faire :

Uno bandiero subre lou titre mostro la lengo de l’article.

Chasque paragrafo a soun numerò.

Chasque numerò es segui de dos bandiero clicablo pèr avera lou meme paragrafo dins la lengo chausido.

Pèr nous escriéure dins l’uno o l’autro lengo >>> Toco


Contacts | Espace privé | Mise à jour le 2 mai 2013 | Plan du site | Haut de Page